ಸಫಾರಿ

ಸಸ್ಯಾಹಾರಿ ಸಫಾರಿ

ಸಫಾರಿಯ ರೋಮಾಂಚನವು ಸಸ್ಯಾಹಾರಿ ಸಫಾರಿಯೊಂದಿಗೆ ಪ್ರಾರಂಭವಾಗುತ್ತದೆ, ಇದು ಸೆರ್ವಿಡೆ ಮತ್ತು ಬೋವಿಡೆ ಕುಟುಂಬಕ್ಕೆ ಸೇರಿದ ಮಿಶ್ರ ಪ್ರಭೇದಗಳನ್ನು ಹೊಂದಿದೆ. 68 ಹೆಕ್ಟೇರ್ ಪ್ರದೇಶದಲ್ಲಿ ಮುಕ್ತವಾಗಿ ಹರಡಿಕೊಂಡಿದ್ದು, ಕಾಂಪೌಂಡ್ ಮತ್ತು ಕಲ್ಲುಮಣ್ಣಿನ ಗೋಡೆಯಿಂದ ರಕ್ಷಿಸಲಾಗಿದೆ. ಈ ವಿಭಾಗವನ್ನು 1970 ರ ದಶಕದ ಮೊದಲು ಅಭಿವೃದ್ಧಿಪಡಿಸಲಾಗಿತ್ತು. ಈ ಪ್ರದೇಶದೊಳಗೆ ಚುಕ್ಕೆ ಜಿಂಕೆ, ಕಡವೆ, ನಿಲ್ಗಾಯಿ, ಕಾಡೆಮ್ಮೆ, ಕೃಷ್ಣಮೃಗ ಪ್ರಭೇದಗಳನ್ನು ಕಾಣಬಹುದು. ಸಫಾರಿ ರಸ್ತೆಗಳಿಂದ ವೀಕ್ಷಣಾ ಪ್ರದೇಶದ ಸಮೀಪದಲ್ಲಿ ವಿವಿಧ ಆಹಾರ ಘಟಕಗಳಿವೆ, ಇದು ಸಂದರ್ಶಕರಿಗೆ ಪ್ರಾಣಿಗಳ ನೈಸರ್ಗಿಕ ಆವಾಸಸ್ಥಾನದಲ್ಲಿ ಇರುವಂತೆ ಕಾಣಸಿಗುತ್ತದೆ. ಉತ್ತಮವಾಗಿ ಸಂತಾನೋತ್ಪತ್ತಿ ಆಗುತ್ತಿರುವುದರಿಂದ ಆಗಾಗ್ಗೆ ಚುಕ್ಕೆ ಜಿಂಕೆ, ಕಡವೆ ಮತ್ತು ಕಾಡೆಮ್ಮೆಗಳ ಮರಿಗಳನ್ನು ಈ ಪ್ರದೇಶದಲ್ಲಿ ಕಾಣಬಹುದು.

ಮಳೆಗಾಲದಲ್ಲಿ ತುಂಬಿ ಬೇಸಿಗೆಯ ತಿಂಗಳುಗಳಲ್ಲಿಯೂ ಸಹ ನೀರು ನಿಲ್ಲುವ ಐದು ಅಂತರ್ಸಂಪರ್ಕಿತ ನೈಸರ್ಗಿಕ ಸರೋವರಗಳಲ್ಲಿ ಸಸ್ಯಾಹಾರಿಗಳು ನೀರು ಕುಡಿಯುವುದನ್ನು ಸಹ ಕಾಣಬಹುದು. ವಿವಿಧ ರೀತಿಯ ಪಕ್ಷಿಗಳು ಮತ್ತು ಮೊಸಳೆಗಳಂತಹ ಸರೀಸೃಪಗಳು ಸರೋವರಗಳಲ್ಲಿ ಕಂಡುಬರುತ್ತವೆ. ಪಕ್ಷಿ ಪ್ರಭೇದಗಳಲ್ಲಿ ಕಪ್ಪು ನಾಮಕೋಳಿ, ಅರಿಶಿನ ರೆಕ್ಕೆಯ ಜಕಾನ, ಪುಟ್ಟ ನೀರುಕಾಗೆ, ಬಿಳಿಕುತ್ತಿಗೆ ನೀರುಕಾಗೆ, ಗದ್ದೆ ಮಿಂಚುಳ್ಳಿ, ಬಿಳಿ ಗರುಡ, ಕೊಳದ ಹೆರಾನ್, ಕತ್ತಲಗುಪ್ಪಿ, ಚೋರೆ ಹಕ್ಕಿ, ನವಿಲು ಮೊದಲಾದವುಗಳನ್ನು ಕಾಣಬಹುದು. ಸರೋವರಗಳ ಮಧ್ಯದಲ್ಲಿ ಮುಕ್ತವಾಗಿ ಲಭ್ಯವಿರುವ ಹುಲ್ಲನ್ನು ತಿನ್ನಲು ಮತ್ತು ಬೇಸಿಗೆಯಲ್ಲಿ ನೈಸರ್ಗಿಕವಾಗಿ ರೂಪುಗೊಂಡ ಕೆಸರುಮಯ ಕೊಳಗಳಲ್ಲಿ ತಂಪಾಗಿರಲು ಬರುವ ಕಡೆವೆಗಳನ್ನು ಕಾಣಬಹುದು.

ಚಿರತೆ ಸಫಾರಿ

ಕರಡಿ ಸಫಾರಿ ನಂತರ ಚಿರತೆ ಸಫಾರಿಯಾಗಿದ್ದು, ಸಂದರ್ಶಕರಿಗೆ ಈ ದೊಡ್ಡ ಬೆಕ್ಕುಗಳೊಂದಿಗೆ ನಿಕಟ ಅನುಭವವನ್ನು ನೀಡುತ್ತದೆ. ಬನ್ನೇರುಘಟ್ಟವು ಮುಕ್ತವಾಗಿ ಓಡಾಡುವ ಚಿರತೆಗಳ (ಪ್ಯಾಂಥೆರಾ ಪಾರ್ಡಸ್) ಉತ್ತಮ ಸಂಖ್ಯೆಯ ನೆಲೆಯಾಗಿದ್ದು, ಈ ಪ್ರಮುಖ ಪರಭಕ್ಷಕಗಳನ್ನು ಎತ್ತಿ ತೋರಿಸುವುದು ಅತ್ಯಗತ್ಯ. ಕೇಂದ್ರ ಮೃಗಾಲಯ ಪ್ರಾಧಿಕಾರದ ಮಾರ್ಗಸೂಚಿಯಂತೆ 20 ಹೆಕ್ಟೇರ್ ಪ್ರದೇಶದಲ್ಲಿ ಚಿರತೆ ಸಫಾರಿಯನ್ನು ನಿರ್ಮಿಸಲಾಗಿದೆ. ಚಿರತೆ ಸಫಾರಿ ಪ್ರದೇಶವು ಅಸಮ ಭೂಪ್ರದೇಶ, ನೈಸರ್ಗಿಕ ಕಲ್ಲಿನ ರಚನೆಗಳು ಮತ್ತು ರಾಷ್ಟ್ರೀಯ ಉದ್ಯಾನವನದ ಅರೆ-ಪತನಶೀಲ ಅರಣ್ಯ ಆವಾಸಸ್ಥಾನವನ್ನು ಒಳಗೊಂಡಿದೆ. ಸುತ್ತಲೂ ರೈಲ್ವೆ ಬೇಲಿ ಹಾಕಲಾಗಿದ್ದ, ಈ ಘಟಕವು 4.5 ಮೀಟರ್ ಎತ್ತರದ ಲಂಬವಾದ ಚೈನ್ ಲಿಂಕ್ ಜಾಲರಿಯಿಂದ ಆವೃತವಾಗಿದೆ ಮತ್ತು ಎಂಎಸ್ ಶೀಟ್ ಅನ್ನು 1.5 ಮೀಟರ್ ಎತ್ತರದ 30 ಇಳಿಜಾರಿನ ಕೋನದಲ್ಲಿ ಇರಿಸಲಾಗಿದೆ. ಇತ್ತೀಚಿನ ದಿನಗಳಲ್ಲಿ ಹೆಚ್ಚುತ್ತಿರುವ ಮಾನವ ಪ್ರಾಣಿ ಸಂಘರ್ಷದಿಂದಾಗಿ, ಬನ್ನೇರುಘಟ್ಟ ಜೈವಿಕ ಉದ್ಯಾನವನ ರಾಜ್ಯಾದ್ಯಂತ ಹೆಚ್ಚಿನ ಸಂಖ್ಯೆಯ ಚಿರತೆಗಳನ್ನು ಹೊಂದಿದೆ. ರಕ್ಷಿಸಲಾದ ಚಿರತೆ ಮರಿಗಳನ್ನು ಆರೈಕೆ ಮಾಡಿ ಸಫಾರಿಗೆ ಸ್ಥಳಾಂತರಿಸಲಾಗುತ್ತದೆ. ಇದು ಪ್ರವಾಸಿಗರಿಗೆ ಈ ದೊಡ್ಡ ಬೆಕ್ಕುಗಳ ಬಗ್ಗೆ, ಬೆಳೆಯುತ್ತಿರುವ ಮಾನವ-ಪ್ರಾಣಿ ಸಂಘರ್ಷಕ್ಕೆ ಕಾರಣಗಳು ಮತ್ತು ಅವುಗಳನ್ನು ಸಂರಕ್ಷಿಸುವಲ್ಲಿ ಕೊಡುಗೆ ನೀಡುವ ವಿಧಾನಗಳ ಬಗ್ಗೆ ತಿಳಿದುಕೊಳ್ಳಲು ಸಹಾಯ ಮಾಡುತ್ತದೆ. ಚಿರತೆ ಸಫಾರಿಯನ್ನು ಕರ್ನಾಟಕ ಸರ್ಕಾರದ ಗೌರವಾನ್ವಿತ ಅರಣ್ಯ ಸಚಿವ ಶ್ರೀ ಈಶ್ವರ್ ಬಿ ಖಂಡ್ರೆ ರವರು 26-06-2024 ರಂದು ಉದ್ಘಾಟಿಸಿದರು. ಇದು ಸಂದರ್ಶಕರಿಗೆ ನೈಸರ್ಗಿಕ ಪರಿಸರದಲ್ಲಿ ಚಿರತೆಗಳನ್ನು ವೀಕ್ಷಿಸಲು ಅವಕಾಶವನ್ನು ನೀಡುತ್ತದೆ.

ಹುಲಿ ಸಫಾರಿ

ಸಫಾರಿಯ ಕೊನೆಯ ಭಾಗವು ಬೆಂಗಾಳ ಹುಲಿಗಳನ್ನು ಹೊಂದಿದೆ. ಎತ್ತರದ ಹುಲ್ಲು ಮತ್ತು ಬಿದಿರಿನ ಪೊದೆಗಳಲ್ಲಿ ಮರೆಮಾಚುವ, ಸಫಾರಿ ಪ್ರದೇಶದಲ್ಲಿ ಅಳಿವಿನಂಚಿನಲ್ಲಿರುವ ಈ ದೊಡ್ಡ ಬೆಕ್ಕುಗಳನ್ನು ಹುಡುಕುವಾಗ ಸಂದರ್ಶಕರ ಉತ್ಸಾಹವನ್ನು ಹೆಚ್ಚಿಸುತ್ತವೆ. ಅವು ವಾಸನೆ ಗುರುತು ಹಾಕುವುದು, ಮರಗಳನ್ನು ಉಗುರುಗಳಿಂದ ಪರಚುವುದು, ನೀರಿನಲ್ಲಿ ಅಥವಾ ಹುಲ್ಲುಗಳ ನಡುವೆ ವಿಶ್ರಾಂತಿ ಪಡೆಯುವುದು, ಸಾಂದರ್ಭಿಕವಾಗಿ ಸಫಾರಿ ವಾಹನಗಳ ಪಕ್ಕದಲ್ಲಿ ಬಂದು ಪ್ರವಾಸಿಗರನ್ನು ಅಚ್ಚರಿಗೊಳಿಸುವುದನ್ನು ಕಾಣಬಹುದು.

ಸಫಾರಿಯ ಹೊರ ಆವರಣದಲ್ಲಿ ತೆರೆದ ಕಂದಕ ಹಾಗೂ ಸರಪಳಿಯ ಜಾಲರಿಯನ್ನು ಮೂರು ಘಟಕಗಳಿಗೂ ನಿರ್ಮಿಸಲಾಗಿದೆ. ಇಂದಿರಾಗಾಂಧಿ ಹುಲಿ ಸಫಾರಿಯು 11 ಹೋಲ್ಡಿಂಗ್ ಹೌಸ್, ಅಪ್ಪಯ್ಯ ಹುಲಿ ಸಫಾರಿಯು 2 ಹೋಲ್ಡಿಂಗ್ ಹೌಸ್ ಗಳನ್ನು ಹೊಂದಿದೆ. ಕೆಲವು ಆಯ್ದ ಪ್ರಾಣಿಗಳ ಗುಂಪನ್ನು ಮಾತ್ರ ಸರತಿಯ ಮೂಲಕ ಸಫಾರಿಯ ಸಮಯದಲ್ಲಿ ಪ್ರವಾಸಿಗರಿಗೆ ವೀಕ್ಷಿಸಲು ಅವಕಾಶ ಕಲ್ಪಿಸಲಾಗಿದೆ.